Их Британийн Засгийн газрын UK Department for Business and Trade (DBT)-ээс зохион байгуулсан “UK–Mongolia Infrastructure Forum: Digital Construction” арга хэмжээ 2025 оны 11 дүгээр сарын 27-ны өдөр амжилттай зохион байгуулагдлаа. Тус форумд Монголын төр, хувийн хэвшлийн төлөөлөл болон Их Британийн тэргүүлэх байгууллагууд болох Connected Places Catapult, British Standards Institution, Zaha Hadid Architects зэрэг байгууллагууд оролцож, дэд бүтцийн салбар дахь дижитал шилжилт, инновац, хамтын ажиллагааны боломжуудыг хэлэлцсэн юм.

Энэхүү форум нь 2025 оны 10 дугаар сард Лондон хотноо зохион байгуулагдсан "UK-Mongolia Infrastructure Forum"-ийн үргэлжлэл болж, илүү практик, салбарын хэрэгцээнд нийцсэн хэлэлцүүлэг, воркшопуудаар өрнөсөн нь онцлог байлаа. Оролцогчид дижитал барилга, ухаалаг дэд бүтэц, стандартчилал болон олон улсын туршлагыг Монгол Улсад нэвтрүүлэх боломжуудыг гүнзгий авч хэлэлцсэн нь өндөр ач холбогдолтой байв.

Тус арга хэмжээнд Улаанбаатар метро төслийн архитектор болон инженерүүд идэвхтэй оролцож, салбарын хөгжилд чиглэсэн санал, туршлагаа хуваалцлаа. Тэд дижитал технологийг дэд бүтцийн томоохон төслүүдэд нэвтрүүлэх нь үр ашиг, ил тод байдал, тогтвортой хөгжлийг хангах чухал хүчин зүйл болохыг онцлон тэмдэглэсэн юм.

Форумын хүрээнд талууд цаашдын хамтын ажиллагааг өргөжүүлэх, Монгол Улсад дэвшилтэт технологи, стандартуудыг нутагшуулах чиглэлээр нягт хамтран ажиллах эрмэлзэлтэй байгаагаа илэрхийллээ. Энэ удаагийн арга хэмжээ нь Монгол, Их Британийн дэд бүтцийн салбарын хамтын ажиллагааг шинэ шатанд гаргах чухал алхам боллоо.