Улаанбаатар метро төслийн нэгжийн төлөөлөл Японы Олон улсын хамтын ажиллагааны байгууллага (ЖАЙКА)-ын суурин төлөөлөгч, Япон мэргэжилтэн Шида Коосүкэ сантай уулзаж, Улаанбаатар метро төслийн хэрэгжилт, цаашдын хамтын ажиллагааны боломжийн талаар санал солилцлоо.

Уулзалтын үеэр төслийн ерөнхий танилцуулга, хэрэгжилтийн өнөөгийн нөхцөл байдал, цаашдын төлөвлөгөөг танилцуулж, төслийг хэрэгжүүлэх явцад анхаарах шаардлагатай асуудал, тулгамдаж буй сорилтуудын талаар ярилцав.

Мөн ЖАЙКА-ийн зүгээс олон улсын метро, хотын төмөр замын томоохон төслүүдийг хэрэгжүүлсэн туршлага, сургамжаас хуваалцаж, төслийн удирдлага, инженер-техникийн шийдэл, зураг төсөл, санхүүжилт болон хэрэгжилтийн зохион байгуулалт зэрэг чиглэлээр мэргэжлийн санал, зөвлөгөө өглөө.

Талууд олон улсын томоохон дэд бүтцийн төслүүдийн сайн туршлагыг Улаанбаатар хотын онцлог болон метро төслийн өнөөгийн нөхцөл байдалтай уялдуулан хэрэгжүүлэх боломжийн талаар мөн санал солилцов.

Улаанбаатар метро төслийн баг ЖАЙКА болон Япон Улсын метро, төмөр замын салбарын туршлагаас суралцаж, мэргэжлийн байгууллагуудтай хамтын ажиллагаа, туршлага солилцоог өргөжүүлэх замаар төслийг олон улсын сайн туршлага, стандартын дагуу үр дүнтэй хэрэгжүүлэхэд анхааран ажиллах болно.

🤝 Туршлагаа хуваалцаж, мэргэжлийн үнэ цэнтэй санал, зөвлөгөө өгсөн ЖАЙКА-ийн төлөөлөлд талархал илэрхийлье.